2/4/2023
Today from Hiiraan Online:  _
Wararka Maanta- Jimco, Dec 2 , 2022
Madaxweyne Mustafe Cagjar " Cid kasta oo aanu is lahayn dambiyo ayay galeen dowladda waanu ka saarnay"
 

Jimco, December, 2, 2022 (HOL) - Madaxweynaha dowlad degaanka Soomaalida Mustafe Cagjar oo si waafi ah uga hadlay tacaddiyadii hadda ka hor ka dhacay degaanka Soomaalida ayaa sheegay in guud ahaan tacaddiyo kala duwan ay ka dhaceen degaanka gaar ahaan xilligii xukuumaddii isaga ka horreysay ee Cabdi Maxamuud Cumar.

Madaxweyne Mustafe Cagjar waxa kale oo uu sheegay inay jiraan guddi la aasaasay oo loo xil saarey inay soo baraan tacaddiyaddii iyo dhibkii kala duwanaa ee hadda ka hor degaanka ka dhacay, balse waxa uu sheegay guddidaasi inaysan wali shaqadoodii billaabin.

Dhinaca kale Madaxweynuhu waxa uu sheegay in xukuumaddiisu uusan wakhti xaadirkan ku jirin qof tacaddi horey uga gaystay degaanka Soomaalida " Cid kasta oo aanu is lahayn dambiyo ayay galeen oo dadka degaanka ayay dhibaato u gaysteen nidaamka dowliga kuma jiraan waanuna ka saarnay", ayuu yiri Madaxweyne Mustafe Cagjar.

Balse Madaxweynuhu isagoo hadalkiisa sii wata waxa uu sheegay inay jiraan dad kamid ah xukuumadda degaanka Soomaalida oo la leeyahay tacaddi bay gaysteen, kuwaas oo wali wax aan wax dambi ah lagu soo eedayn amase aan wax caddaymo buuxa aan lagu haynin, sidaas darteedna aan la iska soo xiri karin waa siduu hadalka u dhigay Madaxweynaha dowlad degaanka Soomaalida Mustafe Cafjar.

Ugu dambayn Madaxweynuhu waxa uu hoosta ka xariiqay in cid walba oo tacaddi loo gaystay ama qof dhibaato ka sheeganaya, inuu helayo caddaalad dhammaystiran maadaama hay'adaha garsoorka ee degaanka wax badan laga badalay.

Dowlad degaanka Soomaalida ayaa waxaa jira dad badan oo dhibanayaal ah kuwaas oo sheegaya in xilliyo hore tacaddi loogu gaystay degaanka sida Jidh dil, Xarig iyo kuwo lamid ah oo dhammaantood ka dhacay degaanka gaar ahaan xilliyadii xukuumaddii Cabdi Maxamuud Cumar.














Click here
12/2/2022 12:28 PM EST
Jimco, December, 2, 2022 (HOL) - Madaxweynaha dowladda Fedaraalka Soomaaliya Dr. Xasan Sheekh Maxamuud oo Maanta ka qeyb galay Munaasabadda Qalin jabinta Aqoonyahannada Soomaaliyeed ee sanadkaan ka baxay Jaamacadda Nabadda ee Qaramada Midoobay ayaa maamulka Jaamacadda waxay go'aamiyeen iney Madaxweynaha ugu magac-daraan xarunta ay ku leeyihiin Soomaaliya.

12/2/2022 9:24 AM EST
Jimco, December, 2, 2022 (HOL) - Duhurnimadii Maanta waxaa dabaq ku yaala degmada Xamar Jajab ee gobolka Banaadir iska soo tuurtay gabar dhalinyaro ah oo magaceeda lagu soo koobay Fartuun.

12/2/2022 6:32 AM EST
Jimco, December, 2, 2022 (HOL) - Guddoomiye ku xigeenka koowaad ee Baarlamaanka Fedaraalka Soomaaliya Sacdiyo Yaasiin Samatar ayaa Maanta magaalada Muqdisho kulan kula qaadatay qaar ka mid ah Culimada Soomaaliyeed oo ay kala hadashay arrimo la xariira hadal dhawaan ay jeedisay oo si weyn u looga falceliyay.

12/2/2022 4:47 AM EST
Jimco, December, 2, 2022 (HOL) - Wararka naga soo gaaraya deegaanka Goofgaduud Buureey oo qiyaastii magaalada Baydhabo ee xarunta gobolka Baay u jirta ilaa 30 KM ayaa sheegaya in ciidamada dowladda Soomaaliya iyo kuwa maamulka Koonfur Galbeed oo halkaasi fariisimo adag ku lahaa iney isaga baxeen deegaankaasi.

12/2/2022 3:13 AM EST
Jimco, December, 2, 2022 (HOL) - Ciidanka Booliiska Soomaaliya ayaa sheegay iney gacanta ku dhigeen nin hubeysan oo dil u geysan rabay askari ka tirsan ciidanka dowladda Fedaraalka Soomaaliya, kaasoo magaciisa lagu sheegay Muxsin Cali Mustaf.

12/2/2022 2:47 AM EST
Jimco, December, 2, 2022 (HOL) - Wararka ka imaanaya deegaanka Deynuunaay ee gobolka Baay ayaa sheegaya in deegaankaasi gacan ku heyntiisa ay la wareegeen dagalaamayaasha kooxda Al-shabaab, kadib dagaalo culus oo shalay galinkii dambe halkaasi ku dhexmaray ciidamada dowladda iyo kuwa Al-shabaab.