ODAWAA: Waxaa jira caqabado ku hor-gudban dhismaha maamulka Hiiraan & Shabelada dhexe
Axad, Maarso 13, 2016 (HOL) — Wasiirka arrimaha gudaha iyo federaalka Soomaaliyia, C/raxmaan Maxamed Xuseen [Odawaa] oo maanta gaaray Beledweyne, ayaa sheegay inay jiraan caqabado ku hor-gudban dhismaha maamulka labada gobol Hiiraan iyo Shabeellada Dhexe
Wasiirka oo warbaahinta la hadlay ayaa sheegay in socdalkooda magaalada Beledweyne la xiriiro siddii xal loogu heli lahaa khilaafka ka taagan dhismaha maamulka labada gobol.
“Anniga iyo xubnaha socdaalka igu wehliya, safarkeennu wuxuu la xiriira sidii loo amba-qaadi lahaa la tashiyada ku saabsan dhismaha maamulka labada gobol, dabcan caqabado wey jiraan, waxaan isku dayi-doonnaa in aan dhameyno wixii khilaaf ah ee jira,'' ayuu yiri wasiirka.
Wasiirka ayaa intaa ku daray in mudada ay joogaan kulamo kala duwan la qaadan doonaan qeybaha bulshada iyo duubabka dhaqanka gobolka oo ay ka wadahadali doonaan siddii loo soo afjari lahaa is-mari-waaga siyaasadeed ee taagan.
“Waanu sii joogaynaa magaalada Baladweyne illaa inta laga af-jarayo muranka ka taagan dhismaha maamulka Hiiraan iyo Shabeellada Dhexe, wada-tashiyo kala duwan ayaaan la yeelan doonnaan qaybaha bulshada iyo duubabka dhaqanka,” ayuu wasiirku mar kale yiri yiri.
Socdaalkan ayaa waxaa wasiirka ku wehlinaya wasiirka batroolka Soomaaliya, Maxamed Mukhtaar Ibraahim iyo xubin ka tirsan Xafiiska ra’iisul wasaaraha xukuumadda Somalia.
Ugu dambeyntii, warar soo baxaya ayaa sheegaya in wafdiga wasiirka ay hor dhac u yihiin wafdi kale oo uu hoggaaminayo RW xukuumadda federaalka Soomaaliya, Cumar C/rashiid Cali Sharma’arke oo sidoo kale la filayo in maalmaha soo socda soo gaaraan Beledweyne.
C/raxmaan Diini, Hiiraan Online
[email protected]
Beledweyne, Soomaaliya
