Dibad-baxyada looga so horjeedo Booliska Canada oo ku fiday gudaha dalkaas
Axad, July 31, 2016 (HOL) —In ka badan 500 oo qof ayaa dibad-baxyo ka dhigay
qaybo kamid ah dalka Canada ,kuwaasi oo ka soo horjeeda dil dhawaan loo gaystay
wiil Soomaaliyeed oo lagu magacaabo Cabdiraxmaan ,kaasi oo sida la sheegay ay
boolisku jir-dileen.
Cabduraxmaan oo 37-jir ah ayaa maalnimadii Isniinta
ee todobaadkii hore u geeriyooday dhaawac xun oo ka soo gaaray jir-dil ay
boolisku ugaysteen ,iyadoo dad-goob-joogayaal ah ay sheegeen in Cabdi aad loo
garaacay ,taasi oo sababtay geeridiisa.
Geerida Cabdi ayaa dadka Canada dib u xusuusiyay
dilal ku salaysan Isirka nacaybka oo booliska Maraykanka ay ku toogteen dhowr qof ,taasi oo markii danbe
sababtay dilal is-xiga oo jawaab u ahaa falalka lagu beegsanayo dadka
madow-ga ah.
Dibad-baxayaasha ayaa ku heesayay ereyo Booliska
Canada looga soo horjeedo ,waxaana dhaq-dhaqaaqa Black lives Matter oo u dooda
dadka madowga ah ay sheegeen in ay sii wadi-doonaan mudaharaad-yadan inta
cadaalad looga helayo kiiska Cabdiraxmaan Cabdi.
“Iyaga ayaa dilay ,mana ahan arin loo dul-qaadan
karo” ayaa kamid ahaa ereyada ay adeegsanayeen dibad-baxyaashaan ,kuwaasi oo
markii danbe hor-yimid xarunta weyn ee booliska magaalada Ottawa si ay
dareenkooda u muujiyaan.
In ka badan 600 qof ayaa maalnimadii Jimcaha ahayd ka qayb-galay aas loo sameeyay marxuum
Cabdiraxmaan ,waxaana dadkii aaskiisa ka qayb-galay kamid ahaa duqa magaalada
Ottowa Jim Watson iyo qaar kamid ah culumaa’idiinka Soomaliyeed ee ku nool
Canada.
Ugu danbayn, Soomaalida Canada ayaa hadda bilaabay
olole xoogan oo dhaqaale loogu aruurinayo qoyska Cabdiraxmaan si cadaalad loogu
helo dilka dhacay ,mana ahan marki ugu horeysay oo fal caynkan oo kale ah lagu
so eedeeyo booliska
Faysal M.Hassan
[email protected]