Dhaq-dhaqaaqa Black lives Matter oo Qorshaynaya Dibad-baxyo ka dhan ah Booliska Canada kadib Geeridii C/raxman Cabdi
Khamiis, July 28, 2016 (HOL) — Hay’adaha u dooda Insaaniyadda ee dalka Canada ayaa
walaac xoogan ka muujiyay geerida Cabduraxman Cabdi oo 37- sano jir ahaa ,iyadoo ay isa- soo
tarayaan shakiga laga muujinayo sida ay booliska Canada ugu lug yeelan karaan geeridiisa.
Marxuumkan
ayaa la sheegay in xubno ka tirsan booliska ay si xun u jir-dileen
,waxaana muuqaalka la soo galiyay mareeg-yada bulshada uu muujiynayaa Cabduraxman
oo wajiga dhulka loo dhigay ,isla markaana si aad ah u dhiig-baxaya ka hor inta
ay soo gaarin kooxaha caafimaadka.
Cabduraxmaan Cabdi oo ahaa 37-sano jir ayaa boolisku ay sheegeen in uu qabay xanuunka Dhimirka.
Inkastoo dhacdooyinkan ay aad ugu yar-yihiin gudaha
Canada ayaa hadana wadanka la dariska ah ee Maraykanka waxaa ka dhacayay dilal
ku salaysan isirka oo ay laamaha boolisku kula kaceen dad madow ah ,taasi oo
markii danbe keentay dibad-baxyo iyo isku-dhacyo khasaare sababay.
Booliska Ontario ayaa bilaabay baaritaano waqtigoodi
laga soo hor-mariyay ,waxaana Naciimo Cali oo ka tirsan qoyska marxuumka ay
sheegtay in Cabdiraxmaan uu geeriyooday 45 daqiiqo ka hor intii aan isbitaalka
la keenin ,taasi oo sii abuurtay shaki hor leh.
Naciim Maalik oo isna ah madaxweynaha midowga
muslimiinta Ottowa ayaa sheegay in uu si joogta ah Cabdi iyo walaalki ugu arki
jiray masaajidka ,isla markaana uu ahaa qof hadal jilicsan,isaga oo tilmaamay
in uusan ka war-haynin xanuunka dhimarka ah ee lagu sheegay.
“Waxa uu ahaa mid aan howl-laha qaar sidii loogu-tala galay u qaban
,waxaana laga yaabaa in ay jirto dhibaato uu ku qabay dhinaca hadalka “ ayuu yiri
Maalik oo lagu wado in uu ka qayb-galo isku soo bax ka dhici doona Ottowa kaasi
oo ay ka soo qayb-gali doonaan dad kor udhaafaya ilaa 200 qof.
Amira Elghawaby oo iyadana kamid ah madaxda ururka
muslimiinta Canada ayaa sheegtay in ay jiraan jawaabo looga baahan-yahay
laamaha dowladda oo la xiriira in falkan uu la xiriiray isir nacayb iyo in kale
Ugu danbayn ,geerida Cabdi ayaa imaanaysa ,iyadoo
Dhaq-dhaqaaqa u dooda madowga ee (Black Lives Matter) uu ku sii faafayo gudaha dalkaasi ,waxaana
sanadkii hore sidan oo kale gacanta booliska ugu geeriyooday Andrew Loku oo ahaa
madow ka soo jeeda dalka Suudaan.
Faysal Mohamed Hassan
[email protected]
