Wasiirka Arimaha Afrika ee Dowladda Ingiriiska oo Muqdisho yimid iyo Madaxda dalka oo la kulmay (SAWIRRO)
Arbaco, Agoosto 03, 2016 (HOL)-Madaxweynaha Somalia Xasan Sheekh Maxamuud ayaa
magaalada Muqdisho ku soo dhaweeyay wasiirka dowladda Ingiriiska u qaabilsan
Afrika iyo Bariga Dhaxe Tobias Ellwood ,kaasi oo u yimid Somaliya sidii uu ula
kulmi lahaa madaxda dalka.Madaxweynaha Soomaaliya ayaa ka guddoomay Wasiirka
dhambaal uga yimid Ra’iisul Wasaaraha cusub ee dalka Ingariiska ,waxaana
dhambaalkaas lagu cadeeyay sida dowladda Ingiriiska ay u garab- taagan-tahay Soomaaliya.
Waxaa kaloo dhambaalkan lagu sheegay in dowladda
Ingiriiska ay xoojin doonto xiriirka kala dhaxeeya dowladda madaxweyne Xasan
Sheekh ,iyadoo lagu wado in dalka ay ka qabsoonto doorasho inta lagu guda jiro
sanadkan 2016-ka.
Xasan Sheekh Maxamuud Madaxweynaha Soomaaliya iyo
Wasiirka ayaa ka wada hadlay arrimo ay ka mid yihiin aminga, siyaasadda iyo
maal-gashiga dalka Soomaaliya oo ka soo kabanaya colaado sokeeye.
Dhinaca kale Ra’iisul-wasaaraha Soomaaliya Cumar
Cabdirashiid ayaa isna dhankiisa la kulmay wasiirkan oo ay ka wada –hadaleen arimo
la xiriira doorashooyinka ka dhacaya dalka iyo waliba amniga.
“Xukuumadda Soomaaliya waxey diiradda saartay arrimaha
amniga iyo xasilinta dalka si loo suurta-geliyo doorasho dalka ka dhacda
sannadkan 2016, waxaan UK uga mahad-celinayaa in ay hormuud ka tahay dadaalka
Soomaaliya lagu xasilinayo “ ayuu yiri
ra’iisul-wasaaraha oo ka hadlayay kulankan.
Ugu danbayn ,magaalada Muqdisho ayaa waxa ka socda kulamo
looga arinsanayo doorashooyinka lagu wado in ay Soomaaliya ka qabsoomaan
,iyada oo ay ku soo qul-qulayaan madax ka tirsan beesha caalamka
si ay ula socdaan xaaladda dowladda ay maal-galiyaan.
Faysal Mohamed Hassan
[email protected]
