Maxkamadaha Islaamka oo soo af-jaray Dagaalkii ay kula jireen Cabdi Qeybdiid, iyadoo caawana ay si Nabadgelyo ah ula wareegayaan hubkii Bashiir Raage

Talaado, July 11, 2006(HOL): Kadib dagaallo socday muddo labo maalmood ah ayay Maleeshiyooyinka Maxkamadaha Islaamka ku guuleysteen in ay soo af-jaraan dagaalkii ay kula jireen Maleeshiyooyinka Cabdi Qeybdiid oo ka tirsanaa Isbaheysigii La-dagaalanka Argagixisada.

Ku dhawaad 30 Tikniko ah oo uu lahaa Cabdi Qeybdiid ayay maxkamadaha la wareegeen, iyadoo ilaa iyo haatanna aan la ogeyn halka uu aaday Cabdi Qeybdiid oo ka hor intii uusan dagaalka bilaabay ku goodinayay in uusan Maxkamadaha isu dhiibi doonin inta ay nafta ku jirto.

Xaruntii uu degaa Cabdi Shukri Cali Xirsi oo isna ka mid ahaa xubnihii Isbaheysiga La-dagaalanka Argagixisada ayaa la isugu geeyay Gaadiidkii tiknikada ahaa ee uu lahaa Cabdi Qeybdiid, iyadoo halkaasina ay isugu tageen Mas'uuliyiin ka tirsan Midowga Maxkamadaha oo uu horkacayay Shiikh Shariif Shiikh Axmed.

Markii la maqlay in Tiknikooyinkii Cabdi Qeybdiid ay Maxkamadaha la wareegeen ayay dadweyne aad u faro badan daawasho u tageen halkii ay labada maalmood ku dagaalamayeen maleeshiyooyinka labada dhinac, iyadoo dadkaasina ay isugu jireen kuwo soo eeganayay guryahoodii oo ay ka qaxeen iyo kuwo doonayay in ay soo arkaan hubka iyo fariisimada laga qabsaday Cabdi Qeybdiid.

Guddoomiyaha Midowga Maxkamadaha Islaamka Shiikh Shariif Shiikh Axmed oo shir jaraa'id ku qabtay dhismo u dhow Xaruntii Villa Baydhabo ayaa si rasmi ah ugu dhawaaqay in uu soo af-jarmay dagaalkii ay kula jireen Cabdi Qeybdiid, wuxuuna shacabka Soomaaliyeed meel uu joogaba uu u sheegay in ay Maxkamadaha Islaamka dagaalkaas guul ka gaareen.

Waxaa uu ka hadlay Shiikh Shariif waxa ku kalifay in ay Cabdi Qeybdiid la dagaalamaan, wuxuuna tilmaamay in dagaalkaas uu ahaa mid ay ka fursan waayeen kadib markii sida uu hadalka u dhigay ay ka soo xirmeen waddooyinkii, hayeeshee haatan wixii ka dambeeya ay arrimahaas dhamaadeen.

Shiikh Shariif waxaa uu sheegay in haatan wixii ka dambeeya uu ammaanka Magaalada Muqdisho noqon doono mid la isku haleyn karo oo ka wanaagsanaan doona midka ka jira caasimadaha Adduunka, wuxuuna ugu baaqay xubnihii ka haray Isbaheysigii La-dagaalanka Argagixisada in ay hubkooda Maxkamadaha ku soo wareejiyaan, �Waxaa loo baahan yahay in hubka yaala caasimadda Muqdisho uu hal gacan soo galo, si nabadgelyada loo sugo�ayuu yiri Shiikh Shariif oo ka sii hadlayay waxyaabaha sii daba dheereeyay xal ka gaarista dhibaatada Soomaaliya.

�Dhibaatada Soomaaliya heysata ee ay ka degi la'dahay waa fara-gelin shisheeye oo hub iyo fikir isugu jirtay, waxaad ogsoon tihiin in Dowladda Itoobiya ay hub ku soo dal-daleysay hub fara badan tan iyo markii la riday Xukuumaddii Mileteriga�ayuu mar kale yiri Shiikh Shariif.

Guddoomiyaha Guddiga Fulinta Maxkamadaha waxaa kale oo uu sheegay in Dowladda Itoobiya ay shalay iyo xalay ciidamo soo gelisay gudaha Soomaaliya, wuxuuna ugu baaqay Dowladda Itoobiya in ay dhowrto derisnimo wanaaga, isla markaana ay ciidamadeeda kala baxdo gudaha Soomaaliya, �Haddii ay Itoobiya ciidamadeeda kala bixi weyso dalka Soomaaliya waxaan ugu baaqeynaa shacabka Soomaaliyeed in dalkooda kala baxaan ciidamada cadawgooda�ayuu yiri Shiikh Shariif oo ugu baaqay Jaaliyadaha Soomaaliyeed ee dibadaha ku dhaqan in ay dalkooda dib ugu soo laabtaan, isla markaana ay ka qeybqaataan dib u dhiska dalkooda.

Dhanka kalena, Wararkii ugu dambeeyay ee hub ka dhigista Maxkamadaha ay sameynayaan ayaa waxay sheegayaan in caawa ay wada hadallo u socdaan Mas'uuliyiin ka tirsan Maxkadamaha Islaamka iyo gacan yarayaashii Bashiir Raage iyo C/qaadir Beebe oo ka taliya Degmooyinka Shibis, Boondheere, Shangaani iyo C/Casiis, iyadoo la rajeynayo in wada hadalladaas la isku af-garan doono, isla markaana hubkii labadaas Hoggaamiye Kooxeed Maxkamadaha lagu wareejin doono iyadoo aaney wax dagaal ah dhicin.

Markaasi kadib haddii Maxkamadaha ay si nabadgelyo ah ugu guuleystaan la wareegidda hubka Bashiir Raage iyo Beebe waxaa kaliya u harsanaan doona Hubkii Hoggaamiye Kooxeedka Muuse Suudi oo haddii ay la wareegaan banaanka u soo saareysa sawir ah in ay Maxkamadaha Islaamka la wareegeen guud ahaan gacan ku heynta Magaalada Muqdisho.

Beelaha Xawaadle iyo Murusade oo Heshiis ka gaaray Colaad horay u dhexmartay

Talaado, July 11, 2006(HOL): Kulan in ka badan hal todobaad uga socday deegaaka Maxaas oo ka tirsan Gobolka Hiiraan  Beelaha Xawaadle iyo Murusade  ayaa la soo gaba gabeeyay kadib markii dhamaanba heshiis buuxa laga gaaray waxyaabihii laga wada hadlay.

Sida uu u xaqiijiyay Hiiraan Online Ing, Max'med Xasan Kulmiye oo ah madaxa  hay'ada Cilmi Baarista iyo Wada tashiga  CRD oo kulankan soo agaasintay waxaa intii uu socday si weyn loogu lafa guray Qodobo ay ka mid yihiin Arrimaha Deegaanka, isu celinta Hantadii la kala dhacay xiligii dagaalka, iyo arinta ku saabsan Magta dadkii ka dhintay labada dhinac oo dhamaantood  is-afgarad buuxa laga gaaray gaar ahaan arrimaha Magta oo dhinacyadu isku afgarteen in Meesha laga saaro.

Ugaasyada labada Beelood Ugaas C/raxmaan Ugaas Khaliif iyo Ugaas C/qaadir Ugaas Xaanshi (Fara-cade) oo labaduba Goob-joog ka ahaa kulanka ayaa markii uu soo gaba gaboobay Hadalo ay jeediyeen waxaa ay kula dar daarmeen dhinacyada heshiiska gaaray in ay iska iloobaan waxyaabihii dhacay waqtigii colaada lagana dhabeeyo heshiiska sida wadajirka ah loo gaaray.

Intii uu socday kulanka ayaa Ergada labada dhinac waxaa ay si dhab ka hadal ah isku weydaarsanayeen waxyaabihii sababay dagaalkii dhexmaray labada Garab, iyadoo la soo bandhigay liisas ay ku qoran yihiin Tiro dad ah oo dhicba dhinaca kale uu ku eedeeyay in ay ka dileen walow markii dambe laga heshiiyay.

Labada Beelood ayaa horaantii sanadkan aynu ku jirno waxaa uu dagaal qaraar ku dhaxmaray deegaano ka tirsan Gobollada Hiiraan iyo Gal-gaduud, waxaana dagaalkii u dambeeyay ee dhaxmara labada Beelood ku geeriyooday  dad kor u sii dhaafaya 20 ruux halka in ka badana ay ku dhaawacmeen.

Dagaallada ku saleysan arrimaha la xiriira Deegaanka amaba dhulka ee ka dhax dhaca Beelaha soomaalida ayaa ah kuwo markiiba hishiis buuxa laga gaaro laakiin inta badan heshiiskaasi uu jabo maadaama reer guuraagu yahay mid is-dhax mara oo ay adag tahay in la kala xakameeyo.

Beesha Tanade oo Maamulka Puntland uga ashtakootay Guddoomiyaha Gobolka Mudug

Talaado, July 11, 2006(HOL): Shir ay waxgaradka, Siyaasiyiinta, Aqoonyahanka Beesha Tanade ku yeesheen Waqooyi Ameerika waxay jawaab ka bixisay hadal ka soo yeeray Guddoomiyaha Gobolka Mudug ninka lagu magacaabo C/rashiid Cali Xaashi Dhuubane, iyadoo sheegay in hadalka uu bixiyay ninkaas uu yahay mid khatar leh oo iska hor keeni kara beelaha deegaanka.

Haddaba qoraalkaasi oo ku socday Xafiiska Wasiirka Arimaha Gudaha Dowled Goboleedka Puntland, isla markaana la ogeysiiyay Xafiiska Madaxweynaha Dowled Goboleedka Puntland, Xafiiska Madaxweyne Kuxigeenka Dowlad Goboleedka Puntland, Ugaaska Beesha Tanade Ugaas Axmed Ugaas Maxamed, Dhamaan Isimada Deegaanka Puntland, Guddoomiyaha Cusub ee Degmada Galdogob iyo Dhamaan maamulka Cusub ee Degmada Galdogob waxaa uu qornaa sidan:

�Waxay halkaan Beesha Tanade ee North America ay jawaab ka bixinaysaa waraysigii uu Gudoomiyaha Gobolka Mudug Bixiyey June 27 th , 06 ee uu kaga hadlay Maamulka Deegaanka Degmada Galdogob.

Ugu horayn, Beeshu waxay aqoonsatay, ayna taageero la garab taagantahay una soo jeedinaysaa hambalyo maamulka Deegaanka Cusub ee la dhisay iyo Gudomiyaha iyo gudoomiye ku xigeenka cusub ee la doortay.

Waxaan cadaynaynaa in hadalkii meel kadhaca ahaa ee ka soo yeeray Gudoomiyaha Gobolka Mudug C/rashiid Cali Xaashi Dhuubane uu ahaa wax kama jiraan ah,  Waxaana cadaynaynaa in Maamulka Deegaanka iyo Gudoomiyahaba ay si nadaamka Puntland waafaqsan  u doorteen dadka Degaanka sida uu  caddeeyey sarkaalkii ay Wasaarada Dawladaha Hoose iyo Horuumarinta Reer Miyigu (Dhagadheere) u soo dirtay inuu goobjoog ka ahaado Dhismaha Golaha Degaanka iyo Doorashada Gudoomiyaha iyo ku xigeenkaba.

Sidaas daraadeed, waxay Beeshu kalsoonidii kala noqotay Guddoomiyaha Gobolka Mudug, laga bilaabo maalintii uu Guddoomiyuhu hadalka Qadafka uu u geystay Beesha Tanade ee ay taariikhdu ahayd June 27 th , 06.

Sidoo kale, waxay Beeshu u soo jeedinaysaa cidkasta oo ay waraaqdaan ku socoto gaar ahaan Wasaaradda Arimaha Gudaha in ay si deg deg ah xilka looga qaado guddoomiyaha gobolka Mudug oo xasilooni darro joogto ah ku haya guud ahaan gobolka.

Ugu dambayntii waxaan u aragnaa Hadalka ka soo yeeray Guddomiyaha Gobolka Mudug mid xasaasi ah, isla markaasna keeni karta khatar fara badan oo Beelaha Deegaanku ku dhex dhici karta.  Sidaas darteed waxaan mar kale si xushmadi ku jirto uga codsnayna guud ahaan Maamulka Puntland in ay arintaan si deg deg ah wax uga qabtaan si loo ilaaliyo midnimada, kala dambeynta iyo nabadgalya Deegaanka�.