Wakiilka Xoghayaha Guud ee Qaramada Midoobay oo Ruushka iyo Sweden u tegaya xal u helidda arrimaha Soomaaliya

Khamiis, October 13, 2005(HOL): Wakiilka Xoghayaha guud ee Qaramada Midoobay u qaabilsan arrimaha Soomaaliya Mr. Francois Lonseny Fall ayaa socdaal ugu ambixi doona magaalooyinka Moscow iyo Stockholm ee dalalka Russia iyo Sweden, iyadoo socdaalkiisana lagu fasiray in uu la xiriiro sii wadidada dadaalada xalka nabadeed loogu raadinayo kala qeybsanaanta ka dhex jirta xubnaha Dowladda Federaalka Soomaaliyeed.

Warbixin laga soo saaray xafiiska Mr. Fall ee magaalada Nairobi ayaa lagu sheegay in Ergaygu uu casuumaad ka helay wasiirka Arrimaha Dibadda ee Dowladda Ruushka Mr. Sergei Lavrov, kaasi oo ay is-weydaarsan doonaan aragtiyo ku saabsan sida ugu fiican ee loo fududeyn karo nabad iyo deganaan ku soo dabaalidda Soomaaliya.

Mr. Francois Fall ayaa inta uu joogo magaalada Stockholm wuxuu 14-15 bishan wada hadal kala yeelan doonaa horumarkii ugu dambeeyay ee Soomaaliya laga hirgeliyay Annika Soder oo Dowladda Sweden u qaabilsan Horumarinta Xiriirka Caalamiga ah iyo weliba mas’uuliyiin kale oo ka tirsan Dowladda Sweden.

Wakiilka Xoghayaha guud ee Qaramada Midoobay u qaabilsan arrimaha Soomaaliya Mr. Francois Fall oo ka howl karsan mas’uuliyiintii ka horeysay wuxuu sidii xal loogu heli lahaa arrimaha Soomaaliya uu u tegay dalalka Masar, Itoobiya, Ingiriiska, Biljim (Xarunta Midowga Yurub) iyo Sweden, isagoo haatan Ruushka ku soo daray dalalka uu kala hadlayo arrimaha Soomaaliya.

Golaha Ammaanka oo arrimaha Soomaaliya dhawaan shir ka yeeshay ayaa wuxuu soo saaray baaq uu ku sheegayay in si aad ah loogu baahan yahay in dib loo soo nooleeyo wada hadallo siyaasadeed oo laga dhex furo hoggaamiyayaasha ka tirsan Dowladda Federaalka Soomaaliyeed.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia

Marwada Madaxweynaha Dowladda federaalka Soomaaliyeed oo maanta si heer sare ah loogu soo dhaweeyay garoonka Magaalada Jowhar

Khamiis, October 13, 2005(HOL): Marwada Madaxweynaha Dowladda Federaalka Soomaaliyeed Marwo Xaawo Cabdi Samatar ayaa maanta si weyn loogu soo dhaweeyay garoonka Diyaaradaha ee magaalada Jowhar, iyadoo soo dhaweyntaasna ay ka qeybgaleen Madaxwyne C/llaahi Yuusuf Axmed iyo xubno ka tirsan labada gole ee Dowladda Federaalka.

Marwo Xaawo ayaa madaxweyne C/llaahi Yuusuf ku wehlineysay socdaalkii uu dhawaan ku tegay Dalka Mareykanka, waxayna kadib ku soo hakatay magaalada Nairobi oo la sheegayo in ay haatan xubno ka tirsan qoyska madaxweynaha Soomaaliya ku nool yihiin.

Sida uu noo soo sheegay Wariye jooga magaalada Jowhar oo aan wararkiisa ku kalsoonnahay marwada Madaxweynaha waxaa la socday Marwo Khadiijo Maxamed Diiriye oo ka tirsan Golaha Wasiirrada Xukuumadda Federaalka Soomaaliyeed iyo weliba Wariyayaal Ajnabi ah oo dabcan Jowhar maanta u tegay in ay berri iyo habeen dambe ka qeybgalaan xuska xafladdii caleemo saarka madaxweyne C/llaahi Yuusuf Axmed oo muddo sanad ah ay ka soo wareegatay.

Xuska xafladda caleemo saarka madaxweynaha oo berri ku beegan ayaa waxay ku soo beegmeysaa iyadoo magaalada Jowhar ay ka wada maqan yihiin Guddoomiyaha Guddiga Siyaasadda ee Gobolka Shabeelaha Dhexe  Maxamed Cumar Xabeeb (Maxamed Dheere) iyo Ra'iisal Wasaare Cali Maxamed Geedi oo ku kala sugan magaalooyinka Addis Ababa iyo Nairobi ee dalalka Itoobiya iyo Kenya.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia

Dowladda Kenya oo Muwaadiniinteeda kula talisay in aysan isugu safrin Xeebaha Soomaaliya

Khamiis, October 13, 2005(HOL): Dowladda Kenya ayaa kula talisay Muwaadiniinteeda in aysan ku safrin Xeebaha Soomaaliya, iyadoo taasina ay ka dambeysay kadib markii seddex markab oo laga leeyahay Dalka Kenya ay kooxo Burcad Badeed ah afduub u geysteen.

Afhayeen u hadlay Dowladda Kenya oo lagu magacaabo Alfred Mutua ayaa sheegay in wargelintoodan ay salka ku heyso iyagoo ka wel welsan in dadkooda ay gacanta u galaan mar kale kooxaha Maraakiibta Af-duubta, iyadoo inta badan shaqaalaha Maraakiibta la af-duubtayna ay yihiin kuwo u dhashay dalka Kenya.

Seddex Markab oo ka diiwaangashan Magaalada Mombasa ee dalka Kenya ayay afduubteen kooxo Burcad ah intii ay ku guda jireen Biyaha Badda Soomaaliya seddexdii bilood ee ugu dambeysay.

Afhayeenka u hadlay Dowladda Kenya waxaa uu intaas ku daray in ay wada hadallo kula jiraan Dowladda Federaalka Soomaaliyeed oo ay kala arrinsanayaan in ay baaritaan ku sameyso waxa ka dambeeya in afduub loo geysto Maraakiibta dalkeeda ka yimaada.

Markab lagu magacaabo MV Semlow oo raashin Mucaawino ah siday ayay kooxo maleeshiyooyin Badeed ah ku heysteen muddo 3 bilood ka badan deegaanka Xarardheere, iyadoo mid kale oo isna raashin mucaawino ah u siday Hay’adda WFP oo lagu magacaabo MV Miltzow laga afduubtay shalay Magaalada Marka ee gobolka Shabeelaha, horayna waxaa u jiray Markab lagu magacaabo MV Torgelow oo isna laga qabsaday meel aan u dheereyn dekedda Ceel Macaan, kaasi oo la sheegay in uu rarnaa ganacsato Soomaaliyeed.

Hay’adda WFP oo markii labaad laga afduubtay markab ay soo kireysatay oo raashin Mucaawino ah u siday ayaa haatan warar ku dhow dhow saraakiisheeda sar sare waxay sheegayaan in ay Raashinka Deeqda ah ay dhinaca dhulka u marsiin doonto dadka u baahan.

Markabka laga af-duubtay Magaalada Marka oo kala bar laga dejiyay rarkii saarnaa ayaa wuxuu raashin mucaawino ah u siday dad ay waxyeelo ka soo gaartay fatahaaddii Webiga Jubba, gaar ahaana dad aad u tiro badan oo ku nool degmooyin ka tirsan Gobolka Jubbada Dhexe, kuwaasi oo haatan qeybtii hore ee raashinkaas loo qeybiyay, inkastoo af-duubka lagula kacay Markabkan ay hakad gelin karto qeybinta raashinkaas.

Dhanka kalena, wararkii ugu dambeeyay ee naga soo gaaray markabka laga afduubtay Degmada Marka ayaa waxay sheegayaan in ay wada hadallo u socdaan maleeshiyooyinkii Markabka afduubatay iyo dad ay isku heyb yihiin, kuwaasi oo ku sugan magaalada Baraawe ee gobolka Shabeelaha Hoose, inkastoo aaney weli wax warar ah oo dheeri ah ka soo bixin sababtii ay maleeshiyooyinka Markabka u af-duubteen.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia

Shiikh Xasan Daahir Aweys oo sheegay in Dowladda Federaalka ay tahay mid aan Islaami ahayn, isla markaana ay dowlad Islaami ah dhisayaan

Khamiis, October 13, 2005(HOL): Hoggaamiye Diimeedka sida weyn loo yaqaano ee lagu eedeeyo in uu xiriir la leeyahay Ururka Al-Qaacidda Shiikh Xasan Daahir Aweys ayaa wacad ku maray in uu dowlad Islaami ah ka hirgelin doono dalka ay sharci darrada ka jirto ee ku yaala Geeska Afrika.

"Dunida reer Galbeedku wey nagu xushmeyn doonaan fikradaha aan ku xulaneyno qaabkii aan dalkeena u xukumi lahayn iyo weliba qaabkii uu ganacsigeena noqon lahaa, taasina waa xuquuqdeena"ayuu yiri Shiikh Xasan Daahir oo muujinayay in uusan raali ka ahayn faragelin dibadda uga timaada Soomaaliya.

Shiikh Xasan Daahir Aweys oo ka mid ah Culumaa’udiinka sida weyn looga yaqaano dalka Soomaaliya ayaa wixii ka dambeeyay 11-kii September ee sanadkii 2001 waxaa lala xiriiriyaa Ururka Al-Qaacidda, iyadoo warbixin dhawaan ka soo baxday Qaramada Midoobayna lagu sheegay in Sheekhu uu hubeynayo boqolaal rag, si ay uga hortagaan awood ay yeelato Federaalka Soomaaliyeed.

Sheekh Xasan waxaa kale oo uu sheegay in saaxibadiisa Islaamka ah oo ay ku jiraan maleeshiyooyin hubeysan aysan nasan doonin ilaa ay ka hirgeliyaan Soomaaliya Dowlad Islaam ah, wuxuuna intaas ku sii daray in uu ka soo horjeedo in wax lagu doorto qaabka reer galbeedka ee Dimoqraadiyadda, isagoo beesha Caalamkana ugu baaqay in ay Soomaalida iyaga u daayaan in ay aayahooda ka tashadaan.

Shiikh Xasan waxaa uu sheegay in dadka Soomaaliyeed ay yihiin kuwo iimaan iyo Diin leh, isagoo Dowladda haatan ka jirta Soomaaliyana ku tilmaamay mid aan Islaami ahayn, sidaas darteed ay dhisanayaan Dowlad Islaam ah.

Mar la weydiiyay in uu weligiis xiriir la sameeyay Hoggaamiyaha Ururka Al-Qaacidda Shiikh Osama Bin Laden iyo in uu Dowladda Eretrea oo cadaawad soo jireen ah kala dhaxeyso Dowladda Ethiopia ayuu Shiikh Xasan ka gaabsaday in uu jawaab waafi ah ka bixiyo labadaas su’aalood, inkastoo uu qiray in uu xiriir la sameysan karo ciddii uu doono.

Saraakiil Mareykan ah ayaa dhowr jeer waxay ku cel celiyeen in Dalka Soomaaliya oo aan lahayn dowlad dhexe oo shaqeneysa tan iyo markii qab qablayaasha dagaalka ay xukunka ka tuureen madaxweynihii hore ee Soomaaliya Marxuum Maxamed Siyaad Barre uu hoy u noqday kooxo argagixiso ah, iyadoo baaritaano la sameeyayna ay sheegeen in weeraro qaraxyo ahaa oo lala beegsaday goobo ku yaala magaalooyinka Nairobi iyo Mombasa sanadihii 1998-kii iyo 2002 laga qorsheeyay Soomaaliya.

Shiikh Xasan Daahir waxaa uu sheegay in dad cadawgiisa ah ay ku eedeeyaan in uu yahay argagixiye, isagoo meeshana ka saaray in dadka Muslimiinta ah ay sidoo kale yihiin kuwo argagixiso ah.

Sanadihii sagaashameeyadii ayay warbixintan oo aan ka soo xiganay website-ka sudantribune sheegeysaa in uu Sheekhu ka mid ahaa aas aasayaashii Urur Diimeedka Al-Itixaad, iyadoo Ra’iisal Wasaaraha Itoobiya Mr. Meles Zenawi uu ciidamo dhowr jeer u diray gudaha Soomaaliya, kuwaasi oo ka hortegayay Dhaqdhaqaaqyada Ururka Al-Itixaad oo kadibna garab ka mid ah laga takhalusay sida ku cad warbixintan, iyadoo markaasi kadibna ay xubnihii ururka u weecdeen dhinacyada Hoogaanka Masaajidyada iyo in ay Macalimiin ka noqdaan Dugsiyada lagu barto Diinta Islaamka.

Laakin Shiikh Xasan Daahir waxaa uu sheegayaa in aysan haatan jirin wax Al-Itixaad la yiraahdo oo isaga si gaar ah loogu shabadeeyo, isagoo tilmaamay in uu haatan hoggaamiyo Xisbi Siyaasadeed oo loogu magac daray Golaha Midnimada iyo Badbaadada Soomaaliyeed (Somali Salvation and Unity Council), wuxuuna intaas ku sii daray in uu ku caawiyay Maxkamadaha Islaamiga ah ee ka dhisan magaalada Muqdisho in ay dadka u qabataan waxyaabihii ay dowlad u qaban lahayd sida sugidda ammaanka iyo waxyaabaha kale ee ay dadka isku qab qabsadaan, kuwaasi oo si waafaqsan shareecada Islaamka lagu kala saaro.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia

Madaxweyne C/llaahi Yuusuf Axmed oo berri xusaya maalintii loo caleemo saaray madaxweynimada Soomaaliya

Khamiis, October 13, 2005(HOL): Maalinta berri ah oo ku beegan 14-ka Oktoobar 2005 ayaa magaalada Jowhar ee xarunta u ah Gobolka Shabeelaha Dhexe waxaa ka dhici doonta xaflad haatanba qaban qaabadeeda halkaas ka socoto, taasi oo lagu xusayo maalintii Madaxweyne C/llaahi Yuusuf loo caleemo saaray madaxweynenimada Soomaaliya.

Madaxweyne Yuusuf ayaa la filayaa in uu xafladan ka jeediyo qudbad ka gedisan tii uu jeediyay maalintii la caleemo saarayay bacdamaa xaalka dowaldda Federaalka uu yahay mid xasaasi ah, iyadoo ay xusid mudan tahay in maalintaas (Oktoobar 2004) ay xubnaha Dowladda ahaayeen kuwo is-raba, marka loo eego haatan oo ay aad u kala fogaadeen.

Xafladii caleemo saarka Madaxweynaha oo ka dhacday sanadkii hore berri oo kale garoonka K/cagta Kasarani ee magaalada Nairobi waxaa ka qeybgalay madax aad u fara badan oo Qaaradda Afrika u badneyd, kuwaasi oo Soomaalida ugu hambaleeyay dowladda ay heleen, iyagoo xubnaha Dowladdana kula dardaarmay in ay noqdaan kuwo mas’uuliyiin ah oo tanaasul muujiya, si ay dadkooda iyo dalkooda u badbaadiyaan.

Madaxweyne C/llaahi Yuusuf haddii uu maalintaas ahaa mid aan mucaarad badan oo dowladdiisa ku dhex jira lahayn, haatan waxaa u sameysmay xubno badan oo Dowladdiisa ka tirsan, kuwaasi oo mar walba ku eedeeya in uu sharciga ku xadgudbay, inkastoo isagana uu isaga difaaco eedeymahaas in dadka u jeedinaya ay yihiin kuwo aan Dowladnimo rabin.

Si kastaba arrintu ha ahaatee, muddo sanad ah ayaa ka soo wareegatay xafladdii caleemo saarka madaxweynaha, tan iyo xiligaasna ma jiraan wax muuqda oo ay Dowladda Federaalka qabatay marka laga reebo safarro ay mas’uuliyiinteeda sare dalal dibadda ah ku tageen iyo in ay iyadii kala cabsaneyso, isla markaana ay kala degan tahay labo magaalo oo kala ah Muqdisho iyo Jowhar.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia