Gudidda beelaha Garxajis oo dhaliilay hadalkii ka soo yeedhay taliyaha Ciidanka Militeriga Somaliland
Isniin, August, 26, 2019 (HOL – Guddida beelaha Garxajis ee ku jirtay dhexdhexaadinta jabhadda Caaare iyo xukuumadda Somaliland
ayaa sheegay inay nabadayntii ay ku
jireen iskaga baxeen, isla markaana dalku badbaado u baahan yahay.
Guddidan ayaa sheegay in hadalkii
shalay ka soo yeedhay taliyaha guud ee Ciidamada Militeriga Somaliland Gen:Nuux
Taanni ay ahayd fariin ku socotay guddidii ku jirta nabadeynta gobolka Sanaag,
waxaanay sheegeen inay hadalkaasi u aqoonsanayaan inuu aha hadal madaxweynaha
ka soo baxay.
Sidoo kale, madax dhaqameedkan
ayaa ku baaqay in waxgaradka iyo madax dhaqameedka Somaliland iskugu yimaadaan
si ay u badbaadiyaan Somaliland.
Suldaan Axmed Cismaan Caddo-Gudde
oo ah gudoomiyaha guddida Garxajis oo arintaasi ka hadlaya waxa uu yidhi “
Taliyaha ciidanka ugu sareeya waa madaxweynaha, madaxweynaha oo aan ogayn
taliye Nuux Taani ma hadli karo afkii madaxweynuhu ku hadlay, madaxweynaha inta
aanan iska arag nabadii aan sidnay ayuu hawada noo soo mariyey jawaab uu usoo dhiibay
taliyaha Ciidanka Nuux Taanni, waxaanay noqotay jawaabtii inuu yidhaahdo
madaxweynuhu qof aan maxkamad la keenin inuu dil ku xukumo, marka hogaamiyahaagu caynkaasi oo kale noqoto
amarkiisa lama qaato, madaxweynaheenu marka uu sidaas u hadlo oo wixii loo
igmaday uu ka baydho inaguna waanu ku diidnay mana aqbalayno ummada isku
haynteeda iyo isku keenideeda ayaa lagu dhiibay ee kala eryidiisa laguuma
dhiibin”
“qoriga xabadii uun baa ka bixin,
dalka waa la wada leeyahay ee dawlad la wada leeyahay ha noqoto ayaanu lahayn,
maanta ayey halkii u dambaysay taagan tahay, waxaan ugu baaqaya salaadiinta iyo
wasgaradka in si degdeg ah shir qaran la iskugu yimaado.”ayuu yidhi suldaanka
guud Suldaan Maxamed Xirsi Qani.
Sidoo kale, dadweynaha iyo
xisbiyada mucaaradka ayaa ka dareen celiyey hadalkii ka soo yeedhay taliyaha
Ciidanka qaranka Nuux Taani, waxaanay arrintaasi u arkeen mid khalad ah,isla
markaana lagu waxyeelayey nabadeyntii laga waday gobolka Sanaag iyo jabhadda
Caare oo waan waan uga socotay xukuumadda iyo Kornayl Caarre.
Barkhad-ladiif M. Cumar, Hiiraan Online
[email protected]
Hargeysa, Somaliland.
