Qaar ka mid ah Odayaashii u tagay Al-shabaab oo xabsiga la dhigay magaalada Beledweyne
Isniin, Augusto, 26, 2019 (HOL)- Kaddib kulan magaalada Beledweyne ay ku
yeesheen saraakiisha hay’addaha Amniga iyo laamaha cadaaladda ayaa leysku
afgartay in dhamaan la soo xiro Odayaashii dhaqanka ee dhawaan u tagay Ururka
Al-shabaab kuwaa oo qaarkood isla maalintii shalayba xabsiga loo taxaabay.
Saraakiisha hay’addaha Amaanka ayaa sheegay in aan marnaba
la aqbali karin in si xor ay ay magaalada isaga joogayaal Odayaashii la soo
macaamilay Ururka Al-shabaab.
‘’Suurtagal ma’aha in odayaashii
dhaqanka ee soo xulay xildhibaannada, aas-aasna u ahaa dowladnimada aynu maanta
heysano, in hadana ay u tagaan Al-shabaab, waxaan heynaa codad sir ah oo laga
soo duubay, qaarkood xabsiga ayaan dhignay kuwa kalana waa lagu raad joogayaa
ayuu warbaahinta u sheegay Maxamed Cabduqaadir oo ka mid ah saraakiisha maxkamada
ciidamada Qalabka oo warbaahinta kula hadlay magaalada Beledweyne.
Dhinaca kale wuxuu sheegay in ay
ku raad joogaan islamarkaana cadaalada la kor keeni doono sida uu hadalka u
dhigay ganacsato lacago ku taageera Ururka Al-shabaab waliba si ka baxan ayuu
yiri xeendaabkooda shaqo.
Al-shabaab ayaa dhawaan deegaannada ay ka
maamulaan gobollada Koonfurta iyo Bartamaha Soomaaliya waxaa ay isugu yeereen
odayaashii dhaqanka ee soo xulay xildhibaannada Golaha Shacabka lamana oga wax
yaabaha ay ka wahadleen labada dhinac, hasse ahaatee inta badan odayaashaa ayaa
xabsiga la dhigay markii ay dib ugu laabteen deegaannadii ay markii hore ka
tageen.
C/raxmaan Diini,
Hiiraan Online
[email protected]
